Gardiscje, un teatri di 12 mil presincis

L’increditament ministeriâl tant che Centri di produzion al è stât un travuart prestigjôs par ArtistiAssociati. Un ricognossiment a nivel talian che al certifiche la soliditât e la cualitât dal lavôr de aziende. Si è slargjade cussì la ufierte che e à al centri la stagjon artistiche dal Teatri Gnûf di Gardiscje (plui o mancul 5.000 spetatôrs) e intal stes timp al propon contemporaneitât e al ative colegaments e relazions artistichis cu la rassegne “Innesti” inte Sale Bergamas. Chest palinsest, bon di tirâ dongje une cuantitât di public ‘gnûf’ (passe 1.000 presincis), al vûl dâ vôs al teatri contemporani, a temis di atualitât che, traviers il teatri, a instilin moments di riflession, di aprofondiment e di dibatiment. In plui o mancul 230 zornadis di viertidure, tignint cont ancje di chês altris propuestis, Gardiscje e à sierât l’an teatrâl cul travuart ambiziôs di12 mil presincis. (A.I.) – 08.06.2024