Altan in mostre cun bestiis, pipins e la Tiere

Al è a stâ di agnorums a Aquilee, ma nol fevele furlan (“no olsi, ancje se o ai simpri fiscât cualchi mût di dî di paîs diferents”), ma cualchi volte lu à doprât un tic intune cariere cetant lungje e di sucès grandonon. Francesco Tullio Altan, in art dome Altan, dissegnadôr, fumetist e “naratôr antropolic” al è un dai nons plui impuartants dal fumet in Italie e tal mont. Dai 13 di Jugn e fint ai 22 di Setembar a Tumieç, tal Palaç Frisacco, e vierç la mostre “Altan. Terra, omini e bestie”, che e met dongje un grum des creaturis inventadis e dissegnadis dal autôr dai agns Setante al dì di vuê. Passe tresinte taulis e vignetis coloradis fatis a pastel, ingjustri, acuarei e tus, di râr presentadis al public. E ven fûr une galarie di sogjets – i abitants de Tiere, oms e animâi – che a fasin ridi, cualchi volte a metin in disasi e par fuarce nus fasin rifleti. Tal mieç de mostre, par cure di Giovanna Durì in colaborazion cun Kika Altan, la salût dal nestri Mont, viodude de bande dai ents animâts e di animâi fantastics o ancje no, che a son dispès al centri de sô creativitât. “O sin bestiis ancje nô – al conte l’autôr de “Pimpa” e ai altris pipins – ma no miôr di lôr, soredut parcè che i animâi a stan daûr dal ambient ancje se no àn voie. Noaltris, invezit, par solit lu fasìn, ma in maniere distrutive”. (A.I.) – 12.06.2024