Udin capitâl de Vuere Frede par trê dîs

Di joibe ai 13 a sabide ai 15 di Jugn a Udin e torne pe seconde edizion la cunvigne internazionâl che e sigle la colaborazion fra Universitât dal Friûl, Universitât di Harvard e Friuli Storia. Par “Sulle tracce della Guerra Fredda in Europa” (Su lis olmis de Vuere Frede in Europe) al è daûr a rivâ cualchi storic dai plui cognossûts dal nestri timp, di Mark Kramer, diretôr dal Centri Studis su la Vuere Frede di Harvard, a David Reynolds, professôr a Cambridge. Il progjet, cu la direzion sientifiche dal storic Tommaso Piffer, si vierzarà cu la Lezion magjistrâl dal storic Andrea Graziosi su “la ereditât de Vuere Frede”. Daspò dal avigniment public, a saran dôs zornadis plenis di intervents e di relazions, cun trente studiôs di dut il mont a confrontâsi sul patrimoni lassât de Vuere Frede: dal centri Europe ae regjon adriatiche, dai Museus ai archivis (cjapâts dentri chei dal KGB in Ucraine) ai bunkers, a chês altris struturis militârs che a son deventadis lis tapis di un circuit di turisim storic. (A.I.) – 13.06.2024