Alc nol va ben intes aghis di mâr de nestre regjon. No dome a stan saltant fûr une vore di improibizions di balneazion, ma al somee che nissun al vedi visât i turiscj de situazion.
A visâ dal probleme e je Rosaria Capozzi, conseire regjonâl dal M5S, che e conte des ordenancis fatis dai Comuns: “A stan mandant fûr cetantis ordenancis di improibizion dal mangjâ moluscs e di balneazion daspò dai controi fats de Arpa Fvg su lis nestri aghis dilunc de cueste. Ce pensie di fâ la Zonte regjonâl e, soredut, parcè nissun nol visial i turiscj che a continuin a lâ in aghe cence che a savedin alc des improibizions?”.
“Lis improibizions par cumò a rivuardin il Lît di Staranzan, Marina Julia e Marina Nova a Monfalcon, la dighe foranie di Triest, il Bagno Muggesano e il Bagno GMT di Mugle, intant che ancjemò no si cognòs il risultât des analisis di Staranzan fin a Lignan. Par di plui, doi dîs indaûr e je stade fate une altre ordenance che e vise de presince di salmonele intai moluscs cjapâts su’ inte lagune e cheste volte la zone improibide e je chê denant dai scarics dal implant di depurazion di Lignan”. (a.d.g.) – 14.06.2024
