Assenteist cronic e plen di bêçs a cjase sô becât de Vuardie di finance

Becât de Vuardie di finance un assenteist che in trê agns al à lavorât nome 9 dîs fasint finte di jessi malât in graciis di certificâts fats di cinc miedis che no jerin par nuie vêrs. L’om, che dal Ministeri de Istruzion al à cjapât passe 40 mil euros di paie, al lavorave in neri intal so paîs di origjin, dongje Reggio Calabria.

Cuant che al tacave l’an scolastic, l’assenteist si presentave intune scuele dal Friûl Ocidentâl dome par trê dîs e dopo al domandave daurman malatie, vivint a cjase sô in Calabrie e cjapant la paie cence fâ nuie.

I financîrs che a àn percuisît la sô abitazion a àn cjatât ancje 300 mil euros in contants, vuadagn de ativitât che il fraudadôr al faseve intant che al jere in malatie, in neri. (a.d.g.) – 19.06.2024