I cuarante agns dal parc Hemingway

Une zornade di iniziativis par celebrâ i cuarante agns de aree verde che e je un dai simbui di Lignan: il parc Hemingway. Par martars ai 25, di fat, a son stâts organizâts diviers apontaments, tra musiche, avigniments par fruts e ativitât a viert. Si scomence aes 9 di matine cuntune cjaminade par cure de associazion Gruppo Artistico Lignano, po aes 11 il laboratori di “Yoga de ridade” e ancje tancj apontaments pai plui piçui, di matine e di dopomisdì. La celebrazion uficiâl dal cuarantenâl si fasarà aes 6.30 dopomisdì, cu la partecipazion speciâl di John Hemingway, il nevôt dal grant scritôr american. Inte ocasion, Matteo Nucci al presentarà il so libri “Sognava i leoni. L’eroismo fragile di Ernest Hemingway” (Al insumiave i leons. L’eroisim fragjil di Ernest Hemingway) in dialic cun Gian Paolo Polesini. A sierâ, il conciert di Francesco Bearzatti in tercet: “Post Atomic Zep”. (A.I.) – 24.06.2024