Un mestri dal Messic ospit dai Amîs de Musiche

“Friuli Concertante”, il festival che al esplore il Friûl storic in itineraris inedits cun musiciscj internazionâi, inmaneât dai Amîs de Musiche di Udin, al va indevant cheste setemane cun doi concierts. Martars ai 25 inte basiliche paleocristiane di Sante Eufemie a Grau, la orchestre Naonis-Donatello, che e met adun i miôr musiciscj de regjon Friûl-Vignesie Julie, direte dal mestri Fernando Saint Martin, ospit dal Messic, e sunarà composizions di Vivaldi e dai contemporanis furlans Carlo Corazza e Valter Sivilotti, cu la partecipazion dal flautist american Tadeu Coehlo e de diretore artistiche Luisa Sello. Miercus ai 26 a Orçan, te Cjase des Muiniis de Providence, il Trio Donatello al sarà protagonist di un conciert par doi flauts e violoncel. Ai prins di Lui, il festival si movarà li dal Museu archeologjic nazionâl di Aquilee e inte glesie di Muimans. (A.I.) – 24.06.2024