Gnove edizion pal libri su la storie di Palme

Intal Salon di onôr dal Municipi di Palme, vinars ai 27 aes 6 dopomisdì, Silvano Bertossi al presentarà la gnove edizion inzornade dal libri “Storia di Palmanova” jessût par l’editôr Biblioteca dell’Immagine. Dome un, ma forsit il plui innomenât, dai libris dedicâts dal gjornalist ae sô citât inte sô produzion cetant siore. Declarade Monument nazionâl intal 1996, sielte tra i borcs plui biei de Italie intal 2020, dal 2017 jentrade a fâ part de Unesco tant che patrimoni de umanitât, Palme, la “citât de utopie”, e je une citât fuartece nassude ae fin dal Cinccent che e spieghe dutis lis regulis e i teoremis dai inzegnîrs dal timp. Studiade a taulin e po dopo fate impegnant miârs di braçs intun lavôr grandonon, e à une forme gjeometriche di stele a nûf pontis, si che duncje dut a Palme al è trê o multipli di trê. (A.I.) – 27.06.2024