A son passe doi mil i citadins freâts di une aziende trevisane cu la scuse dal Superbonus pes cjasis. E di chescj, 355 a son de nestre regjon: 213 tal Friûl ocidentâl, 107 a Udin, 30 a Gurize e 5 a Triest. Inte rêt de Agm Group di Conean a son restâts cjapâts cetancj di lôr, come che e à discuviert la Vuardie di finance di Trevîs, comandade di Daniele Leonetti. La aziende che e fraudave si presentave come buine di garantî ducj i lavôrs clâfs in man.
Pecjât che dopo vê cjapât tra i 300 e i 2.500 euros par fâ un studi preliminâr, che a varessin vût di jessi tornâts indaûr, i servizis prometûts no vignivin fats e i clients a restavin ancje cence nissun benefici fiscâl.
I financîrs a àn scoltât passe 350 citadins che vulintîr a àn dât une man inte investigazion; daspò i agjents si son presentâts a cjase dai aministradôrs de societât, distaponant la fraude. I doi aministradôrs de aziende a son stâts acusâts di fraude de Procure de Republiche di Trevîs. (a.d.g.) – 01.07.2024
