A Siest, un “tinel” prime dai concierts in place

“Sexto ‘nplugged”, il festival di Siest, al presente chest an “Sexto Lounge”, une aree a jentrade libare a tacâ des 6 dopomisdì, prime dai concierts plui spietâts. Un tinelut a cîl viert cun disc jockey (soredut feminis), mostris, spetacui, intervents artistics e barachins in plaçute Burovich, a doi pas di place Cjistiel. Une altre propueste dal festival che, intal cûr di un dai borcs medievâi plui antîcs e biei di Italie, al viodarà in conciert inte storiche place abaziâl Cosmo miercus ai 3, Tony Ann joibe ai 4, Marte del Grandi e A Toys Orchestra vinars ai 5, Jadu Heart e Bdrmm sabide ai 6, I Hate My Village e Slowdive domenie ai 7. (A.I.) – 02.07.2024