Cui varessial mai dite che al tornave di mode il tabac di mastiâ? E invezit a Udin, i financîrs de Compagnie di Vignesie a àn secuestrât ben 114 chilos di tabac – cence il contrassegn dal Monopolio di Stato – intune buteghe di telefonie e informatiche. Il secuestri al è rivât dilunc di une operazion plui grande cuintri lis fraudis, inviade in Venit. Inte buteghe di Udin i agjents a àn cjatât la cuantitât plui grande di tabac che al veve di jessi metût in vendite in dut il Nord-Est a pro dai citadins bengalês e pakistans che a son usâts a doprâlu une vore.
La Vuardie di finance e à secuestrât in dut passe 140 chilos di tabac, denunciant ancje doi buteghîrs pakistans che a lavorin a Vignesie, Padue e Mestre. Al è stât denunziât ancje il proprietari dal negozi di Udin par cuintribant, intant che i doi pakistans a son stâts segnalâts ancje ae Agenzia delle dogane e dei monopoli par fâ il cont des tassis no paiadis. (a.d.g.) – 04.07.2024
