Cjatât muart un anzian di Tarcint che al jere jessût par fâ une cjaminade

Un om di 80 agns al è muart daspò jessi sbrissât jù tal torint dilunc di une escursion. L’incident al è sucedût îr tal dopomisdì a Tarcint: al somee che l’anzian al fos jessût di cjase par fâ une piçule cjaminade dongje dal torint Tor.

La famee, cuant che sot sere no lu à viodût tornâ indaûr, e à clamât i carabinîrs. Lis ricercjis a son tacadis cun pompîrs, volontaris de Protezion civîl e tecnics dal Socors alpin cul jutori ancje dai cjans. Dopo pôc il cuarp cence vite dal puar om al è stât cjatât. A son stadis esclududis responsabilitâts di altris inte muart dal anzian. (a.d.g.) – 05.07.2024