Al tache il trafic pesant su lis autostradis de nestre regjon. Il prin fin de setemane di Lui al segnarà une cressite impuartante dal trafic dilunc de rêt di Autostrade Alto Adriatico, ancje par cause dal inviament des licuidazions e de visite di Pape Francesc a Triest.
A pet di sabide ai 29 di Jugn, cuant che a son stâts regjistrâts 172 mil transits, par sabide ai 6 di Lui si previôt che a passaran plui di 190 mil veicui. Dilunc de autostrade bande Triest, sedi di matine sedi tal dopomisdì, e sarà une zornade di bolin ros, intant che di matine dilunc de A28 bande Puart e dilunc de A4 bande Vignesie, par dut il dì al sarà trafic fuart (bolin zâl).
I casei plui sot pression a saran chel di Triest Lisert e di Tisane, che in dut a fasaran passe 40 mil passaçs, intant che a San Donà a saran 12 mil e a Vilès (Gurize) 11 mil.
Bolin zâl inte zornade di domenie ai 7 di Lui cu la prevision di plui di 170 mil mieçs in viaç. Codis e ralentaments a podaressin sucedi dilunc de A4 di dutis i dôs lis bandis. (a.d.g.) – 05.07.2024
