Al è muart vie pe gnot passade Benito Nonino, l’om che al à savût fâ deventâ la sgnape, che e jere un licôr di ostarie, un prodot une vore rafinât. Nonino al veve 90 agns e, adun cu la sô femine Giannola, al jere rivât a fâ cressi la sô piçule aziende di famee fin a fâle deventâ une marche innomenade in dut il Mont. L’imprenditôr al è muart a cjase sô, indulà che e je ancje la aziende a Percût, paîs indulà che al jere nassût ai 6 di Fevrâr dal 1934.
Tal 1973 Nonino, apassionât fin di frut ae ativitât de distilarie, al veve prodot la prime sgnape “Monovitigno Picolit”. Al jere costret di timp a doprâ une carocele e ancje îr, tal dopomisdì al veve domandât di jessi puartât dentri de distilarie. Messaçs di corot a son rivâts di dutis lis istituzions politichis e economichis de nestre regjon. (a.d.g.) – 08.07.2024
