Darte: un non, un lûc, une rassegne

Il Festival Darte, la rassegne che tal titul e lee la art e il non par furlan dal comun che al vuide la manifestazion, al torne pe sô cuarte edizion cu lis sôs particolaritâts. Dai 11 ai 21 di Lui, par disesiet apontaments tai siet comuns associâts (Darte, Çurçuvint, Paulâr, Zui, Tumieç, Verzegnis e Sudri), teritoris e comunitâts a ufrissin musiche, escursions, visitis vuidadis e piçul teatri ator dal teme “L’acqua racconta” (La aghe e conte). Il festival diret de flautiste Luisa Sello al à tal mieç la condivision di esperiencis e i abitants dai borcs a fasin a gare par dâ acet al public, fasint vivi la storie, il paisaç e lis tradizions a cui che al rive. Tai paisuts de Cjargne a rivin concierts cun artiscj di chenti e internazionâi in formazions diferentis, dal solist ae orchestre. La prime setemane e tache joibe ai 11 a Palaç Savoia di Darte cu la innomenade formazion di arcs vienese Kropfitsch New Generation Ensemble, intant che vinars ai 12 a sunaran Marko Feri e Igor Zobin. Il dì dopo a Luviee, Luisa Sello cun Gianni Fassetta, e domenie ai 14 i concierts a son trê, ancje te cjase museu La Mozartina 2 di Paulâr. (A.I.) – 09.07.2024