Om e femine cjatâts muarts dentri cjase a Udin

Une cubie indevant cui agns – jê dal 1941 e lui dal 1947 – a son stâts cjatâts muarts vuê a buinore intun apartament in vie Bariglaria a Udin. A jerin muarts di timp. Par cumò, cundut che la autoritât judiziarie e vedi decidût di fâ altris controi sui cuarps, al somee che la muart e sedi dal dut naturâl.

E je stade une vicine di cjase a clamâ i pompîrs, parcè che e sintive odôrs stomeôs che a rivavin propit de cjase dai doi anzians. Cuant che i pompîrs a son jentrâts inte lôr abitazion, a àn cjatât i cuarps.

Al è pussibil che daspò de muart di un di lôr, chel altri nol vedi sopuartât il dolôr de pierdite daspò di une vite passade  insiemi. Sul puest il miedi legâl e i carabinîrs de stazion di Udin Est. (a.d.g.) – 10.07.2024