La roture vie pe gnot di une tubazion tal teritori dal Comun di Pulfar al à dât problemis a Cividât, intes Vals dal Nadison e a Manzan. Come che al à visât l’Acuedot Poiana, par cause di un vuast in chei teritoris a son restâts cence aghe tancj citadins. Problemis ancje a Manzan, indulà che i citadins a àn visât che e jessive aghe di colôr maron dai rubinets vie pe matine. “O vin justât il vuast ma e ocorarà ancjemò un pôc di timp par tornâ ae normalitât tal teritori di Cividât”.
Tes ultimis oris a son problemis ancje a Tavagnà e a Culugne. Il Cafc al à visât che tal prin câs si trate di une pierdite che e sarà justade tal principi de prossime setemane. A Culugne invezit i citadins a lamentin che e salte fûr aghe di colôr scûr, probleme leât al lavament des tubazions di açâl che al è leât a sediments che si son fermâts in cualchi pont.
Lis operazions di lavament des tubazion a laran indenant ancje intai prossims dîs e il Cafc al invide i citadins a visâ dai eventuâi problemis al numar vert 800 713711, che al mandarà tecnics sul puest. Lunis ai 15 di Lui, par cause di lavôrs dilunc de rêt de aghe no sarà aghe a Martignà in 69 stradis, des 8.30 di matine aes 6 sore sere. (a.d.g.) – 11.07.2024
