“Art tal ort” e rive tal parc Brun di Udin

Trê seradis di spetacul ae insegne dal divertiment tal “Giangio Garden” di Udin, li dal parc Brun di viâl Vat, inte suaze de rassegne “Gnots di Cjavrîs”, che chest an e je part di “Art tal Ort – festival di art par strade”, inmaneât di Felici ma furlans. Lis datis di segnâ in calendari a son chês di joibe ai 18, vinars ai 26 e miercus ai 31: trê avigniments sore nuie par ogni gjenar di spetatôr, tacant di “Appeso ad un filo”, un spetacul di marionetis plen di poesie e divertiment, cu la compagnie Di Filippo Marionetti, che po dopo e zire il Friûl par “Art Tal Ort”. Ai 26 tal Giangio Garden e torne Caterina “Catine” Tomasulo e ai 31 “The loser”, un spetacul di umorisim stramp. (A.I.) – 17.07.2024