La “realtât aumentade” dai Subsonica

I Subsonica a fasin tape a Lignan sabide ai 3, inte Arene Alpe Adria, cun “La bolla”, la tournée che ju viôt protagoniscj dai principâi festival dal Istât, suntun palc spetacolâr dulà che e je tante atenzion ae tecnologjie e aes senografiis. La storie dai Subsonica e je jentrade inte “Realtât Aumentade”, compagn dal titul dal lôr gnûf album jessût chest an, che al à assorbît tante realtât intai sunôrs, intai ritmis e intes peraulis. Un disc che al conte il presint, tocjant temis di cumò traviers diviers nivei di leture, ma cul stîl inconfondibil che al caraterize il grup dal 1996. (A.I.) – 02.08.2024