No va par nuie ben. A dîlu a son i esercents e i parons di albierc di Lignan: “La situazion di cumò no nus fâs sperâ ben – al declare Matteo Battiston, referent de Confesercenti di Lignan -. Chê che e someave une buine stagjon si è trasformade invezit in un Istât che al lasse il marum in bocje. O vin dal 10 al 15% in mancul di presincis a pet dal an passât e o patìn un fuart sbassament dai turiscj che a rivin de Austrie e de Gjermanie, ancje se a rivin un pôc di plui de Europe dal Est”.
I esercents a pontin il dêt cuintri de mancjade programazion de bande des Aministrazions comunâls dal passât e a disin che la stagjon si è scurtade a dome 60 dîs di lavôr: “Fintremai che a Lignan si rive dome par lâ al mâr, no podìn fâ altri che rindisi aes cundizions dal timp e no si capìs parcè che par esempli lis termis di Riviere a puedin sierâ intant che chês dai vicins a son plenis ducj i fin de setemane”.
Ancje lis ordenancis masse restritivis dai ultins dîs agns a varessin, par Battiston, slontanât i zovins di Lignan che e jere deventade famose pal divertiment di sere e vie pe gnot e a ocorin invistiments smicjâts par fâ tornâ i fantats. (a.d.g.) – 06.08.2024
