Tornât a vierzi il colegament cul Cjadovri

E je tornade a vierzi tor lis 3 dopomisdì la strade regjonâl 355 che e coleghe il Friûl al Cjadovri, blocade daspò dal slac che al jere vignût ju’ a Sapade vie pe gnot tra martars e miercus.

Su che strade a son vignûts ju’ passe trê mil metris cubis di tiere e claps. I lavôrs par meti dut a puest a son tacâts za inte buinore di îr. Vuê di matine l’assessôr regjonâl ae Protezion civîl, Riccardo Riccardi, al à sorvolât cul elicotar la aree batude dal brut timp par controlâ cuâi che a son i problemis plui urgjents. Daspò al à cjatât i tecnics e i aministradôrs locâi che cun chei e je stade cjapade la decision di tornâ a vierzi la strade. (a.d.g.) – 08.08.2024