L’omaç a Giovanna Marini si fâs martars ai 20

Stant che lis cundizions meteo de serade a jerin inciertis, al è stât rimandât a martars ai 20 di Avost il spetacul te cort dai Colonos di Vilecjaze di Listize “Il canto necessario” (Il cjant necessari), dedicât a Giovanna Marini, une des personalitâts plui impuartantis par chel che al rivuarde il studi e la ricercje de tradizion musicâl popolâr taliane, muarte ai 8 di Mai di chest an. Autore, dongje di ricercjadore e etnomusicolighe, e je stade une figure centrâl par dute la culture taliane dai ultins sessante agns. Ae serade di “Avostanis”, par cure di Valter Colle, il ricercjadôr di Udin che al à publicât cetancj dai siei lavôrs e le veve cognossude za tai agns Setante, cuant che Marini e veve disvilupât la forme de “cjantade”, e je stade invidade une schirie di atôrs, musiciscj, artiscj: Angelo Battel, Gualtiero Bertelli, Mario Brandolin, Vanni Floreani, Michele Gazich, Laura Giavon, Coro La Tela, Tania Pividori, Massimo Somaglino. (A.I.) – 19.08.2024