A Clauian la storie de conzure cuintri Beltram

Al è dedicât a Orsola della Francesca, tra teatri e musiche, l’apontament dal festival itinerant “Friuli Concertante” in program joibe ai 22 inte Aziende Foffani tal borc medievâl di Clauian. “Orsola 1350. La conzure cuintri il Patriarcje Beltram” al è il titul dal spetacul cun protagoniste la atore Bruna Braidotti e i acompagnaments strumentâi dal ensemble Euterpe, ducj adun par contâ la vite de prostitude di Udin che e jere vignude a cognossince par câs dal complot cuintri il Patriarcje de bande di tancj feudataris ribei, ma soredut de Republiche di Vignesie, che mâl e sopuartave un Stât fuart e indipendent ai siei confins: chel furlan. Il monolic de atore, dramaturghe e regjiste cividine al sarà intervalât di tocs musicâi metûts intal periodi storic de vicende. (A.I.) – 21.08.2024