La vite di une atore zovine taliane e cravuate

Joibe ai 22 tal ex Convent di Sant Francesc di Pordenon si vierç la tierce edizion de rassegne teatrâl regjonâl “Antiche dimore” (Cjasis antighis), nassude di une idee de diretore artistiche, Silvia Lorusso, autore e regjiste di cualchi spetacui in program, e par cure de associazion Le Muse Orfane. Il spetacul “Piango in lingua originale” di e cun Carla Vukmirovic, al fronte cun ironie e profonditât lis dificoltâts di vê di sielzi la proprie strade inte vite partint dai propris dubis e di chei di une prospetive specifiche: chê di une atore zovine taliane-cravuate, nassude achì di une famee scjampade aes vueris de Jugoslavie, cul bagai di dôs culturis. Il spetacul al à debutât in ocasion dal Mittelfest e tal Teatri Miela di Triest, otignint une grande rispueste di critiche e di public. (A.I.) – 21.08.2024