A Comelians une zornade par Zorç Ferigo

Dute une zornade dedicade a Comelians a un dai siei fîs plui preseâts, Zorç Ferigo, musicist, storic, inteletuâl, ma ancje miedi de prevenzion. Aes 5 dopomisdì in Sale Alpine si tache cuntun dialic a cuatri vôs, “In salût e in malatie”, ispirât al so mût ironic e rigorôs, garp e puntuâl, di capî la salût publiche. Une riflession su la sience mediche, sui siei mecanisims e su la burocrazie, che Ferigo al veve metût in struc cussì: “ogni san al è un malât che nol sa di jessilu!”. Aes 9 sot sere, presentazion di “Il troppo e il vano”, che al fâs part dal progjet su Giorgio Ferigo “Un inteletuâl intal 900”. Renato Rinaldi in dialic cun Lorenzo Fabbro al presentarà, cui inserts musicâi di Urtie, il podcast fat par Rai Radio Tre, che al conte la sô parabule inteletuâl midiant intervistis ineditis, realizadis in ocasion di cunvignis, concierts, trasmissions radiofonichis e traviers lis testemoneancis di cualchi miedi, storic e antropolic che lu à acompagnât intal so percors. (A.I.) – 22.08.2024