La capitâl dai struments di len

Dopo i apontaments dal mês di Jugn, len e musiche a tornin protagoniscj pal avigniment conclusîf di “Risonanze Festival”, in graciis dal apontament cu la oficine de art “Legno vino”, che e permetarà ai visitadôrs di cognossi i struments musicâi e i mestris che ju àn fats cun finece. Intal centri di Malborghet, sabide ai 24 e domenie ai 25 di Avost, al larà sù il sipari su la rassegne ideade e direte di Davide Fregona cu la direzion organizative par cure di Luca di Varmo, che e viodarà i rifletôrs pontâts su dutis lis declinazions dal len aplicadis ae musiche, in graciis di conferencis, incuintris e la pussibilitât di provâ pardabon ancje i struments musicâi. Tancj i ospits de rassegne, che e siere ancje la edizion 2024 di “Risonanze”: costrutôrs di struments ancje antîcs, e cetancj musiciscj par une schirie di concierts. (A.I.) – 23.08.2024