Doi dîs cu lis corâls tes plêfs de Cjargne

Doi dîs di coralitât, nature, spiritualitât e condivision. Sabide ai 24 e domenie ai 25 di Avost e torne, pe novesime edizion, “La lungje gnot des plêfs in Cjargne”: une rassegne preseade no dome dai apassionâts di musiche vocâl, cun ospits corâls di nivel internazionâl e lis miôr espressions regjonâls, ma ancje di cui che al fâs il turisim “lent”, o chel intai lûcs religjôs, e ancje di cui che al è sostignidôr dai prodots alimentârs naturâi a “km 0”. La manifestazion curade de Corâl dal Friûl-Vignesie Julie e sostignude di Regjon e de Fondazione Friuli, cu la direzion artistiche di Cristiano Dell’Oste, e ufrìs la pussibilitât di passâ une fin de setemane di musiche a jentrade libare intai lûcs pûrs des glesiis rupestris antighis de Cjargne. Intal rispiet totâl de nature e dal ambient, e ancje cu la pussibilitât di cerçâ mangjative e bevandis tipichis ufiertis di aziendis dal teritori. Ospits di cheste edizion a saran corâls che a vegnin di Gurize, Lubiane, Carinzie e di Triest, cun programs che a van de musiche antighe a chê contemporanie, tocjant ancje lis dimensions dal pop e des gnovis musichis, par dissegnâ une partidure di comunion artistiche e culturâl tra tieris di confin. Sabide ai 24 si tache inte plêf di Sante Marie Oltrebut di Tumieç, po dopo inte plêf di S. Martin a Vile di Verzegnis. Trê i apontaments di domenie ai 25: inte plêf di Sante Marie Madalene di Divilin, in chê di Sant Elar e Taziano di Denemonç e par sierà, une cjaminade cun dutis lis corâls adun, cuntune vuide specializade e lant daûr dal percors dal Cjamin des plêfs in Cjargne, di Denemonç a Soclêf, fint a Castoie. (A.I.) – 23.08.2024