Lis mostris dal Cjistiel di Udin a puartin plui visitadôrs

A plui di doi mês de sô inaugurazion, la mostre dedicade al fotograf Gianni Berengo Gardin intal Cjistiel di Udin e à passât lis 10 mil, anzit lis 11 mil visitis. Il biliet pal complès museâl al permet ancje la visite ae mostre dedicade al mestri venezian de fotografie e ae rassegne screade ai 13 di Mai, fate dal MAXXI, il Museu nazionâl des arts. A pet dai agns passâts, il Cjistiel, in part in graciis di cheste esposizion e ancje de rassegne di prime, dedicade al ‘700 jenfri Vignesie e Imperi, al à fat regjistrâ une impuartante incressite di visitis intai prins sîs mês dal an. La mostre, inmaneade tant che un viaç cronologjic, topologjic e tematic traviers la Italie viodude e fotografade dal artist intun percors dilunc dai setante agns di cariere dal fotograf, si pues visitâle fint ai 15 di Setembar. (A.I.) – 26.08.2024