Paolo Paroni diretôr de Orchestre sinfoniche dal F-Vj

La FVG Orchestra e à rinovât lis propriis cjariis e e à confermât Paolo Petiziol president e Claudio Mansutti diretôr artistic pai trê agns che a vegnin. Pe prime volte, la istituzion musicâl e sinfoniche dal F-Vj e varà ancje un vicepresident: Flavia Virili, vicesindiche e assessore ae Culture dal Comun di Glemone. Il gnûf Consei diretîf al sarà formât ancje di Cristiano Dall’Oste, delegât de Regjon, Simone D’Eusanio delegât dal Comun di Monfalcon, Francesco Martines delegât dal Comun di Palme, Sergio Dell’Anna delegât dal Comun di Udin e Adriana De Biase delegade dal Comun di Pordenon. La orchestre, simpri plui impegnade sul teritori talian e ancje di là dal confin, e varà ancje une diretore organizative, Simona Macrì. Paolo Paroni al sarà il diretôr principâl, dongje dal diretôr ospit Florian Krumpöck. Dopo la polse estive, la orchestre e torne a tacâ a sunâ ai 29 di Avost a Triest: dopo Gjinevre, Vile Manin e sul Vaiont in ocasion dal aniversari de tragjedie dai 9 di Otubar dal 1963. (A.I.) – 27.08.2024