Une rassegne che e je simpri une sorprese

Spetacui itinerants e multimediâi, danze urbane, gnovis tecnologjiis, teatri e zûcs di rûl a son ducj dentri de decime edizion di “In\Visible Cities”, lis citâts invisibilis, il festival inmaneât de associazion Quarantasettazeroquattro che al ufrìs esperiencis che a son simpri une sorprese. In dut a saran 35 i apontaments, cun cinc gnovis produzions e 70 artiscj in trê comuns. Dai 28 ai 31 di Avost a Gurize, il prin di Setembar a Gnove Gurize e dai 4 ai 8 di Setembar a Gardiscje, a rivaran compagniis di teatri di nivel internazionâl, specializadis te ricercje di gnûfs lengaçs: Agrupación Señor Serrano, Madalena reversa, Trickster-p, Babilonia Teatri…, ma ancje cetancj altris. I spetacui, ancjemò une volte, a saran atents a leâ sperimentazion e la pussibilitât di jessi viodûts di un public larc e svariât, ancje personis cun disabilitât. I spetacui a son tancj, e cualchidun nol è mai stât fat prime: par esempli “Gorizia Cold Case”, di gjoldi lant daûr dai atôrs, o “Brucia prigione brucia – Basaglia a corpo libero” o il spetacul multimediâl sul Lusinç “Un fiume. Paesaggio sottile”, dongje di balet e musiche, come chê dal cjantautôr Cristiano Godano. (A.I.) – 27.08.2024