Il Tiliment no si tocje. Lu àn scrit in mût clâr lis associazions ambientalistis Legambiente, WWF, Lipu e Foce del Tagliamento odv, che a visin che la Europe e previôt di meti in sigurece il flum in maniere naturâl e no cun oparis di ciment che a varessin un impat une vore fuart.
Inte suaze di cheste posizion i ambientaliscj a pontin il dêt cuintri de Regjon e de Autoritât di bacin che a proponin grandis oparis come la roste tra Dignan e Spilimberc, che cuintri di chê si son declarâts ancje i doi Conseis comunâi. E che, se e fos fate, a fiscarès a val e a mont l’ambient e il paisaç ancjemò bon dal flum.
Par di plui, a visin lis associazions, la Regjon e à spindût bêçs europeans par meti a puest i Magrêts a mont dal puint di Dignan. In chescj dîs e je jentrade in vore la leç europeane sul ristabiliment de nature che si clame Nature restoration law che e previôt ancje di meti a puest la continuitât dai flums par 25 mil chilometris inte Union europeane.
Se il Friûl-Vignesie Julie al propon oparis sul Tiliment che a van par traviers, al larès dret cuintri cheste leç. Une vore miôr, secont lis associazions, lassâ pierdi lis grandis oparis che a ruvinin il flum e pensâ invezit a dutis lis alternativis pussibilis e dilunc dut il cors dal flum. (a.d.g.) – 27.08.2024
