Ecelencis de regjon in conciert a Dartigne

A son doi i concierts inte fin de setemane che l’Ecomuseu des aghis dal Glemonat al dediche a Dartigne, consolidant la colaborazion cul Comun, la Pro Dartigne e la Parochie. Dôs lis glesiis tiradis dentri, cun gjenars musicâi diviers, leâts de ecelence dai interpretis. Sabide ai 31 inte Plêf di S. Martin si esibiran Luisa Sello e Alberto Busettini, al flaut e al clavicembal, inte suaze de rassegne “Friuli concertante”, cuntun spetacul dedicât a Johann Sebastian Bach. I doi a proponaran cuatri sunadis in esecuzion integrâl par flaut traviers e clavicembal. Domenie al prin di Setembar, inte Gleseute di S. Stiefin in Borc Clama, conciert par ghitare acustiche di Paola Selva, musiciste ecletiche, autore e compositore, ative ancje in cualitât di rangjadore e premiade in cetancj concors tant che soliste e intune cun altris musiciscj. (A.I.) – 30.08.2024