Cjalâ la lune de vecje strade dal cjanâl de Ciline

Ultin apontament di “Blanc European Festival” 2024, par cure de direzion artistiche di Riccardo Pes, sabide ai 31 inte vecje strade dal cjanâl de Ciline, vierte intal 1906 par esigjencis leadis ae costruzion dai prins implants idroeletrics, dismetude intal 1992. Il titul dal spetacul al è evocatîf. “Ti regalo la luna” (Jo ti doi la lune), ven a stâi musiche e riflessions su la magjie dal nestri satelit, simpri cjantade dai artiscj di dut il mont, inmagâts dal clarôr delicât e de vene di misteri. Traviers la poetiche de musiche, il sopran Silvia Celadin e il pianist Pierluigi Piran, supuartâts de leture sientifiche dal fisic e ricercjadôr Fabrizio Coccetti, a permetaran al public di acedi cun facilitât e naturalece ae dimension di cidin e bielece dal nestri satelit. (A.I.) – 30.08.2024