Il portîr dal Udin ae Mostre dal cine

Il portîr dal Udin Maduka Okoye al à cjapât part ae Mostre dal Cine di Vignesie tant che protagonist, in bande di Seydou Sarr (za viodût in “Io capitano”) dal docufilm “Il sogno non ha colore” (Il sium nol à colôr). Prodot di Wonder Cinema e Rai Cinema in colaborazion cun Lega Serie A, il cine al trate temis di integrazion e lote al razisim: argoments condividûts de societât furlane in graciis de sô nature multiculturâl. Okoye, l’unic zuiadôr presint ae ‘prime’ dal cine, al à pandût la sô sodisfazion par vê contribuît a sensibilizâ sul teme de integrazion traviers il sport. “Tant che zuiadôrs – al à dit – o vin di doprâ la nestre popolaritât par sensibilizâ ducj su chest teme, tacant dai fruts, e par tignî il razisim fûr dal sport”. (A.I.) – 03.09.2024