Un pas indenant pai lavôrs te stazion di Cjasarse

Al è pront il studi di fatibilitât di Rfi par gjavâ vie lis barieris architetonichis inte stazion dai trens di Cjasarse: il Comun, adun cun chei altris ents interessâts, al à vût il document par dâ il so parê. Dopo al tocjarà al progjet esecutîf e tal 2025 a tacaran i lavôrs, che la comunitât ju spiete di timp e che la aministrazion comunâl vuidade dal sindic Claudio Colussi al veve lavorât une vore par otignîju.

Cul gnûf an a saran fats ancje altris lavôrs inte zone de ferade cul recupar de aree storiche indulà che si riparavin lis locomotivis, che e deventarà il secont museu feroviari dal Friûl-Vignesie Julie. (a.d.g.) – 03.09.2024