Une messe di 200 agns indaûr in Basiliche

Une prime esecuzion assolude in timps modernis e je al centri dal penultin event musicâl in program inte Basiliche di Aquilee, vinars ai 6, inte suaze dal cartelon dai “Concierts in Basiliche”, promovûts de Fondazion Societât pe Conservazion de Basiliche di Aquilee cu la Corâl polifoniche di Rude, pe direzion artistiche di Pierpaolo Gratton. “O stella maris” al è il titul de Messe grande consegnade plui di dusinte agns indaûr dal compositôr furlan Pietro Alessandro Pavona pe Assunzion de Vergjine Marie. A riproponile intal nestri timp a saran la Academie di arcs “Arrigoni” e l’Ensemble Mittelvox diret di Mateja Černic. Come simpri la jentrade e je libare e sore nuie, fint a esauriment dai puescj, cun prenotazion obligatorie su: www.basilicadiaquileia.it. (A.I.) – 05.09.2024