A restin aromai nome trê glaçârs su lis Alps Juliis e si trate di pôcs grops di glace: a son il glaçâr dal Montâs, chel de mont Cjanine e chel dal Terglou che si cjate in Slovenie. Ce che al reste di lôr al è a pene il 5 par cent dal volum di glace che e jere su lis Alps Juliis dilunc de Piçule ere glaciâl.
E je cheste la situazion, par nuie buine, contade de cuinte tape de Caravane dai glaçârs 2024, la campagne taliane fate di Legambiente in colaborazion cun Cipra Italia e cu la partnership dal Comitato glaciologico italiano. Il glaçâr de mont Cjanine, che al jere larc 9,5 etars intai Agns ’50, vuê al è ridot a 1,4 etars e il so spessôr -che in medie tal principi dal ’900 al jere di passe 90 metris- si è ridot a dome 11 metris. Identiche situazion pal glaçâr dal Terglou, che, ancje se si cjate plui ad alt, al è passât dai 40 etars dal 1946 ai 0,2 dal 2022, pierdint il 98% de sô estension. Si salve il glaçâr dal Montâs judât dal fat che al cjale a Nord, si cjate in ombre e al è larc 7 etars.
Ce che al sta sucedint ai nestris glaçârs, al à dit Valter Maggi, president dal Comitato Glaciologico e professôr de Universitât Milano Bicocca, e je la prove direte dal cambiament climatic. Par chest al covente movisi daurman: “Al è impuartant – e à dit Vanda Bonardo, responsabile taliane pes Alps di Legambiente e president di Cipra Italia – tignî sot control ce che al sta sucedint in chestis areis par rivâ a tutelâlis miôr”. Par chest Legambiente e propon un program di lavôr: inviâ daurman il control de biodiversitât dai ambients glaciâi, adun cun plans di adatament ai cambiaments climatics; definî une rêt ecologjiche che e sedi buine di colegâ i varis habitat; fâ atenzion al impat des ativitâts dal om; fâ plui sfuarçs par meti in vore gnovis areis protetis e cirî di tutelâ almancul il 30% dal teritori dentri dal 2030; par finî, disvilupâ gnovis strategjiis par miorâ la protezion di chescj ecosistemis par garantî la lôr esistence, visantsi che il 2025 al sarà l’An internazionâl dai glaçârs. O almancul di chei pôcs che nus restin. (a.d.g.) – 05.09.2024
