Sucès pe mostre di mosaics a Spilimberc

Si è sierade la trentesime edizion di “Mosaico&Mosaicis”, la mostre estive de Scuele Mosaiciscj dal Friûl, che ancje chest an e à vût un grant sucès di public, viodût che intun mês a son rivâts plui di sîs mil visitadôrs, ancje dal forest. Apontament aromai consolidât pal Istât di Spilimberc, la mostre e presente il miôr di ce che al è stât ideât, progjetât e fat dilunc dal an formatîf dai arlêfs de Scuele Mosaiciscj: un percors espositîf fat soredut di mosaics, di chei di stîl roman a chei contemporanis. Un repertori di museu che traviers copiis, interpretazions e creazions origjinâls al fâs rivivi la storie formâl dal mosaic vie pai secui. (A.I.) – 09.09.2024