La ARLeF – Agjenzie regjonâl pe lenghe furlane e clame adun ducj i fruts, sabide ai 14 di Setembar aes 16.30, te sezion Moderne de Biblioteche Civiche “V. Joppi” di Udin. In ocasione di Friuli Doc al sarà presentât il gnûf fumut “Ciak! Si colore cun GnognoWood” cun protagoniscj Bombo, Rugne, Agnul & Icaro, il professôr Einsaur e tancj altris simpatics dinosaurs. Il mont dal cine, in chest câs jurassic, al è il teme di cheste gnove publicazion siore di colôrs, promovude de ARLeF in colaborazion cu La Vita Cattolica.
I Gnognosaurs, personaçs nassûts tal 1996 dal lapis spiçât dal ilustradôr Andrea “Dree” Venier, a compagnin par man i fruts a scuvierzi la lenghe furlane. Vie pal laboratori, inmaneât de ARLeF in colaborazion cul Comun di Udin e la Biblioteche civiche “V. Joppi”, i piçui dai 3 ai 10 agns a podaran cognossi di dongje i segrets di chescj dinosauruts, apassionâsi aes lôr aventuris e salacor provâ a dissegnâju.
Ae fin, a ducj i piçui partecipants ur vignarà regalade une copie dal gnûf fumut. Si scuen notâsi dentri dai 13 di Setembar, scrivint a info@sportelfurlan.eu (comunicant non e etât dai fruts). (a.d.g.) – 10.09.2024
