Un puint tra lis culturis di confin

Une rassegne bienâl plene di iniziativis culturâls che a anticiparan e a compagnaran la Capitâl Europeane de Culture. Un puint che al unirà dut il teritori Gurizan, in Italie e in Slovenie. Al è “Cross Culture”, il festival che al tache miercus ai 11 a Gurize, in Cjase Ascoli. La sede gurizane de Societât Filologjiche Furlane e ospitarà une serade sul teme “Il paisaç gurizan intai voi des autoris leterariis”, cuntun program siôr, che al previôt musiche e leturis par talian, sloven e furlan di autoris ativis inte suaze multiculturâl dal teritori. Tra lis tantis iniziativis in program vie pe Sierade si segnalin une serade conciert dedicade a Pietro Zorutti e la presentazion de gnove edizion de racuelte di poesiis “Impiâ peraulis” di Celso Macor. (A.I.) – 10.09.2024