Il brut timp che al sta batint il Friûl-Vignesie Julie cun ploiis fuartis e temperaduris che si stan sbassant di corse a tachin a dâ i prins pinsîrs, cun inagaments e arbui colâts un pôc par dut.
La situazion plui grivie e je stade fin cumò a Mugle, inte localitât Vignan, indulà che il torint Menariolo al è jessût fûr tor des 8.45 di matine. Une persone anziane e je stade puartade vie de sô abitazion par jessi curade dai sanitaris. Si è decidût ancje di evacuâ un centri comerciâl, intant che il trafic al è stât blocât par motîfs di sigurece.
Inagaments ancje a Gurize, Lignan, Triest e inte sô provincie, indulà che une vore di stradis e di cjasis a son ladis sot aghe. Aiaron e ploie, cun di plui, a àn provocât la colade di arbui in cetancj comuns come Nimis, Udin, Spilimberc, Gurize, Davian e Triest. Lis scuadris di emergjence dai pompîrs e de Protezion civîl a son in vore par tirâ vie i arbui colâts e meti in sigurece lis zonis batudis dal brut timp.
Tal dopomisdì e je ancje rivade la nêf tal Tarvisian cu la Mont Sante di Lussari che cumò e je imblancjade. (a.d.g.) – 12.09.2024
