Al è partît il Codiç ros pal om che îr ai 15 di Setembar in plen centri a Pordenon, sul cricâ dal di’, al à dât jù ae sô ex compagne e i agjents de Polizie lu àn daurman blocât.
L’om al à spietade la femine sot di cjase sô, in viâl della Libertà intant che e tornave di une serade cun amîs, e le à pacade in maniere violente. La puarete e je rivade a scjampâ e a salvâsi cul jutori di altris personis che a àn ancje clamât lis fuarcis dal ordin. A son rivâts daurman i agjents de Scuadre di pront intervent, che a àn cjatât l’om une vore alterât cun maglis di sanc sui vistîts e la femine cu la muse tumefate e cuvierte di sanc.
Sul puest ancje une ambulance che e à puartât la siore tal ospedâl plene di pôre. La prognosi e je di trente dîs. Il violent invezit, che al veve bielzà cjapât un amoniment dal Cuestôr, al è stât metût ai arescj domiciliârs par lesions ingriviadis. (a.d.g.) – 16.09.2024
