Grancj cicliscj in mostre a Spilimberc

Ultins dîs di viertidure a Spilimberc pe mostre “Tour de France” di Robert Capa e altris fotografs de Magnum, inmaneade dal CRAF – Centri di Ricercje e Archiviazion de Fotografie cun Suazes e Magnum Photos. La esposizion, tal Palaç Tadea e fate in colaborazion cu la Regjon F-Vj, il Comun di Spilimberc, la poie de Fondazion Friuli, e je componude di passe 100 imagjins dai mestris de innomenade agjenzie fotografiche Magnum. E je une esplorazion de dimension umane dal ciclisim che e celebre dôs figuris di liende dal sport talian, che a àn vinçût in epochis diviersis il Tour: Gino Bartali e Marco Pantani, ma e presente ancje un grant atlete furlan che lu à vinçût par ben dôs voltis, cent agns indaûr, tal 1924 e tal 1925: Ottavio Bottecchia, “el furlan de fero”. Fint ae sierade ai 29 di Setembar, il CRAF al organize visitis vuidadis ae mostre, la domenie dopomisdì tacant des 4. (A.I.) – 17.09.2024