“Maratonina”, une fieste pe citât di Udin

Cuatri dîs di fieste pe citât e par cui che le vîf fasint ativitât fisiche tal viert, prime ancjemò che di garis, cu la vincjesime cuarte edizion de “Maratonina Internazionale Città di Udine”, la piçule maratone di 21,097 km, inmaneade de associazion direte di Paolo Bordon. Chest an e tache za joibe ai 19 di Setembar, invezit che la sere dal vinars, cu la proiezion di un documentari, intant che la matine dopo e sarà screade ancje une mostre di fotografiis. Daspò de corse su’ pal Cjistiel – 400 metris par 29 di disnivel, di fâ ducj a volop -, sabide ai 21 e je previodude di buinore une cunvigne. Di dopomisdì, ve la MiniRun, ven a stâi la corse cence premis par fantats e fantatis sot i 13 agns e po dopo la sfide “a sîs çatis” intune cui cjans. Domenie ai 21, des 9.30 di buinore, a tachin la piçule maratone e la StraUdine, cheste cuntun circuit di 8,5 km. L’itinerari al è dut in comun di Udin: tancj i coridôrs innomenâts a nivel talian, tacant di Pietro Riva, vice campion european de mieze maratone a Rome, fint a Sara Nestola, medaie di arint ai campionâts europeans dal 2023, dongje dai centenârs di iscrits. (A.I.) – 18.09.2024