“Maman!”, la Tv dai fruts ae fieste dal miluç

Ancje chest an, in ocasion de edizion numar 28 de Fieste dal Miluç di Tumieç, al torne l’apontament tradizionâl cun Maman!. Inte suaze de manifestazion che e animarà la citât cjargnele, al è in program un dopomisdì dedicât ai plui piçui cun “1, 2, 3, 4, 5… Numaruts cun Maman!”. Il laboratori ludic didatic, proponût de ARLeF – Agjenzie regjonâl pe lenghe furlane, si fasarà sabide ai 21 di Setembar, aes 3.30 di dopomisdì, tal tendon in place XX di Setembar. Adun cu la lôr beniamine Daria Miani, la condutore de trasmission TV Maman!, i fruts a podaran passâse cui simpatics modonuts, une vore colorâts, protagoniscj dal carton animât “I Numaruts”. Il carton al è la version furlane di “Numberblocks”, la innomenade serie de BBC che e jude i plui piçui a imparâ a fâ di cont. A saran proietadis ancje pontadis dal carton trasmetudis intant di Maman!, il program par fruts dut par furlan (su Telefriuli, ogni vinars aes 6.30 di dopomisdì, in repliche la domenie aes 7 e ae 1 di dopomisdì, e su la TV on demand) e che si puedin cjatâ ancje tal sît arlef.it e tal canâl YouTube de ARLeF. (A.I.) – 20.09.2024