Une serade “par ducj” inte Basiliche di Aquilee

Dopli avigniment in sieradure dal fortunât cartelon dai Concierts in Basiliche 2024, che al à acompagnât il public intai mês estîfs cun ospits internazionâi e produzions impuartantis, ducj a gratis. Sabide ai 21 al è in program il conciert conclusîf dal program dal Istât inte Basiliche, pe ocasion par cure de Orchestre sinfoniche Esagramma – Esagramma Symphony In-orchestra, il prin ensemble inclusîf di Europe: un organic di 44 musiciscj, cun artiscj professioniscj metûts dongje di zovins cun discomut psichic e mentâl. E sarà pardabon une serade “par ducj”, inte “Basiliche par ducj”, cui tocs sinfonics voltâts in imagjin de artiste “dal savalon” Erika Abelardo-Eka, il tenôr Francesco Cortese e il sopran Silvia Bonesso, direts di Gabriele Rubino. (A.I.) – 20.09.2024