Polizie locâl di Udin in siopar, il Comun al spere tai volontaris

Nol è lât a bon fin il tentatîf di conciliazion fat de Prefeture par sconzurâ il siopar dai agjents de Polizie locâl par domenie ai 22 di Setembar, inte stesse zornade che a varessin di jessi a Udin la Maratonine e la StraUdine. Il siopar al è stât proclamât par dute la zornade e i agjents si cjataran denant di palaç d’Aronco des 9 e mieze di matine a misdì e mieç par protestâ.

A chest pont, la uniche pussibilitât par garantî il davuelziment des dôs manifestazions impuartantis e je che il Comun al clami un numar avonde alt di volontaris tra i alpins e chei de Protezion civîl. (a.d.g.) – 20.09.2024