A Cinemazero, cine mut ogni setemane

Si vierç cuntun dopli apontament, martars ai 24 e ai 25 di Setembar li di Cinemazero, la rassegne di seradis dal mut dedicade aes oparis mestris dal cine mut che a fasin cent agns, inmaneade in colaborazion cu lis Zornadis dal Cine Mut – che dai 5 ai 12 di Otubar a presentin la cuarantesime tierce edizion – e cu la Cineteche dal Friûl. Stant che di passe cuarante agns studiôs di dut il mont a corin a Pordenon pal festival, i organizadôrs a àn pensât di dâ la pussibilitât di viodi e di riviodi i grancj cines muts almancul une volte al mês. Si scomence cun “I Nibelunghi” di Fritz Lang, jessût intal 1924, une des principâls oparis mestris dal cine mut, intune copie restaurade. Intes setemanis che a vegnin, altris cines di cent (e passe) agns indaûr (Dziga Vertov, Buster Keaton) e un omaç pai 100 agns de muart di Eleonora Duse. (A.I.) – 23.09.2024