Pordenonelegge: une altre edizion cun grancj numars

Cinc zornadis memorabilis pe vincjesime cuinte edizion de Fieste dal Libri, di simpri ancje une fieste di libertât, cu lis peraulis sotlineadis dal President de Republiche Taliane, Sergio Mattarella, intal messaç mandât pe zornade di scree. “Pordenonelegge” 2024 al à ospitât passe 600 autoris e autôrs talians e internazionâls, par 340 incuintris in 43 puescj, cun avigniments simpri plens. E intune edizion straordenarie, che si è concludude cu la partecipazion ancje de vincidore dal Premi Campiello, Federica Manzon, il festival al regjistre ancje lis primis stimis sui dâts des venditis dai libris, ancjemò in aument a pet dai 20 mil de edizion passade. La vincjesime seste edizion e je za in program dai 17 ai 21 di Setembar dal 2025, ma i incuintris cui libris, i autôrs e lis autoris a van indevant par dut l’an, tacant il prin Otubar cul cartelon autunâl di “Fuori_città”. (A.I.) – 23.09.2024