Une Biblie furlane in Paraguay

E je stade consegnade in forme uficiâl ae Biblioteche Nazionâl dal Paraguay, inte citât di Asuncion, la repliche de Biblie di Gutenberg fate a S. Denêl e donade de Fondazion Scriptorium Foroiuliense. Ae cerimonie a jerin presints l’ambassadôr de Italie in Paraguay, Marcello Fondi, l’arcivescul Edmundo Valenzuela, il diretôr de Biblioteche Nazionâl Paraguaiana, Javer Ortiz e cetancj altris ospits. In colegament video dal Friûl, il president de Fondazion, Roberto Giurano, al à contât cemût che e je stade fate la copie de biblie di Gutenberg e il significât impuartant de donazion pal infuartiment des relazions jenfri Italie e Paraguay. La copie donade e je une des siet fatis dal Scriptorium in cjarte di coton fate a man e doprant tecnichis di stampe dal dut similis a chês dal stes Gutenberg. Il Paraguay al sarà la uniche Nazion dal Sudameriche a vê une copie, che e je stade benedide dal arcivescul di Asuncion e che e sarà la protagoniste principâl de “Setemane internazionâl de Biblie”. (A.I.) – 24.09.2024